Karibuni kwenye Blogu Rasmi ya Serikali ya Jamhuri ya Muungano wa Tanzania. Huu ni Uwanja wa Wananchi Kupata Taarifa Mbalimbali za Serikali na Masuala Mengine ya Kijamii, Kisiasa, na Kiuchumi. Blogu hii inaratibiwa na Ofisi ya Msemaji Mkuu wa Serikali kupitia Idara ya Habari (MAELEZO).

TET Kufanya Mapitio Makubwa ya Sita ya Mitaala Tangu Uhuru

Na Zaituni Hussein MAELEZO

Taasisi ya Elimu Tanzania (TET), imesema tangu Tanzania ipate Uhuru mwaka 1961, imefanya mapitio makubwa sita ya mitaala ya elimu lengo likiwa ni kuwajengea wahitimu ujuzi utakaowawezesha kujitegemea na kutumia vema fursa zinazopatikana nchini, hususani kwa kujiajiri, kuajiriwa na kumudu maisha yao ya kila siku pale wanapohitimu mafunzo.

Kati ya mapitio hayo, matano tayari yalishafanyika mpaka kufikia mwaka 2014, na sasa kazi ya kukusanya maoni ya wadau kwa ajili ya pitio la sita inaendelea.

Mkurugenzi Mkuu wa Taasisi hiyo, Dkt. Aneth Komba amebainisha hayo alipokuwa akizungumza na Waandishi wa Habari Jijini Dar es salaam kuhusu uetekeleza wa shughuli za Taasisi ya Elimu Tanzania (TET) na mwelekeo wa utekelezaji wa Bajeti ya Serikali kwa Mwaka wa Fedha 2022/2023.

“Mapitio ya kwanza yalifanyika mwaka 1967 kwa lengo la kuondoa mitaala ya kibaguzi ya wakoloni, mapitio ya pili yakafanyika mwaka 1979 kwa lengo la kuhimiza matumizi ya nadharia, na kupitia mapitio hayo kulianzishwa masomo ya michepuo, mapitio ya tatu yakafanyika mwaka 1997 ambayo lengo lake lilikuwa  kukidhi matakwa ya sera ya mwaka 1995 pamoja na kuingiza mapendekezo ya tume ya makweta ya mwaka 1982, mapitio ya nne yalifanyika mwaka 2005 ambayo yalipelekea kuanzishwa kwa mtaala ambao ulilenga kujenga umahiri, na mapitio ya tano yalifanyika mwaka 2014 ambayo yalikuwa na lengo la kuingiza stadi za kusoma, kuandika na kuhesabu kuanzia elimu ya awali.” amesema Dkt. Komba.   

Serikali Kuwekeza Katika Makazi ya Kuwatunza Wazee

Na WMMJW Morogroro

Serikali inayoongozwa na Rais Samia Suluhu Hassan imekusudia kuwekeza katika Makazi ya Wazee nchini ili kuwa na miradi mbalimbali itakayozalisha mazao na kuchangia katika mapato ya Serikali.

Hayo yamesemwa na Katibu Mkuu Wizara ya Maendeleo ya Jamii, Jinsia, Wanawake na Makundi Maalum wakati akizungumza na Waandishi wa Habari mkoani hapa mara baada ya kuhitimisha ziara yake ya kukagua huduma zinazotolewa na Makazi ya Wazee katika Mikoa ya Singida, Manyara, Kilimanjaro na Morogoro.

Alisema kuwa ziara hiyo imefanyika kimkakati ikiongozwa na Waziri wa Wizara hiyo, Katibu Mkuu, Naibu Katibu Mkuu na wataalam wengine wa Wizara, imelenga kukagua huduma zinazotolewa katika Makazi 14 yenye Wazee 271 yanayosimamiwa na Wizara ili kuweka mikakati na mbinu mbalimbali zitakazosaidia makazi hayo kuwa na huduma bora na kuwekeza nguvu katika miradi mbalimbali ya kilimo, mifugo na uzalishaji mali katika makazi hayo.

Akizungumza kuhusu uwekezaji wa miradi ya maendeleo katika Makazi hayo nchini amesema mfano Makazi ya Wazee Fungafunga yenye ekari 10 yanaweza kutumika katika shughuli za kilimo cha mbogamboga, ufugaji wa kuku na miradi mingine ya kimkakati.

“Makazi haya ndio tunatoa huduma kwa wazee wasiojiweza na wasio na ndugu ila hamkatazwi kuzalisha, hapa nilipo katika Makazi haya ya Wazee Fungafunga Afisa Mfawidhi wa hapa amekuwa mbunifu na kutumia eneo kulima mbomboga zinazosaidia wazee na pia kuongeza kipato”, alisema Dkt. Chaula.

Aidha, ametoa rai kwa jamii kuwajibika katika malezi ya wazee kwani sehemu salama na ya kwanza ya wazee ni katika familia zao ili waweze kupata huduma bora na uangalizi mzuri kutoka kwa ndugu na familia zao.

Pia alisisitiza wananchi kujitokeza kuhesabiwa tarehe 23/08/2022 ili kusaidia kupata takwimu sahihi hasa za wazee nchini kwa ajili ya kusaidia kuweka mikakati stahiki ya kuwahudumia wazee katika utoaji wa huduma hasa za Afya na huduma nyingine muhumu kwa wazee.

TCDC Kuzindua Mfumo wa Kielektroniki wa Usimamizi na Ukaguzi wa Vyama vya Ushirika


Na Jacquiline Mrisho – MAELEZO


Tume ya Maendeleo ya Ushirika (TCDC), inatarajia kuzindua Mfumo wa Kielektroniki wa Usimamizi na Ukaguzi wa Vyama vya Ushirika mwishoni mwa mwezi  huu wa Agosti, 2022.


Hayo yamebainishwa na Mrajis wa Vyama vya Ushirika na Mtendaji Mkuu wa Tume hiyo, Dkt. Benson Ndiege wakati akizungumza na Waandishi wa Habari leo jijini Mbeya kuhusu utekelezaji wa Bajeti ya taasisi hiyo kwa mwaka 2021/22 na mwelekeo wa bajeti kwa mwaka 2022/23.


Dkt. Ndiege amesema kuwa, Tume katika mwaka 2021/2022, ilijiwekea vipaumbele vya utekelezaji hususan katika maeneo ya kuimarisha ukaguzi na usimamizi wa Vyama vya Ushirika, kuratibu uhamasishaji, utafiti na utoaji wa elimu ya maendeleo ya Ushirika, kuimarisha masoko, uwekezaji na uwezeshaji wananchi kiuchumi.

TCDC Yajipanga Kutekeleza Vipaumbele Tisa Bajeti ya 2022/23


Na Jacquiline Mrisho – MAELEZO


Katika Bajeti ya Mwaka wa Fedha 2022/23, Tume ya Maendeleo ya Ushirika (TCDC) inatarajia kutekeleza vipaumbele tisa ikiwa ni muendelezo wa kutekeleza majukumu ya Udhibti na Usimamizi wa Vyama vya Ushirika pamoja na Uhamasishaji wa maendeleo ya Sekta ya Ushirika nchini.


Mrajis wa Vyama vya Ushirika na Mtendaji Mkuu wa Tume hiyo, Dkt. Benson Ndiege ameeleza vipaumbele hivyo leo jijini Mbeya wakati akizungumza na Waandishi wa Habari kuhusu mwelekeo wa bajeti ya taasisi hiyo mwaka huu wa fedha.


“Vipaumbele tulivyojiwekea kwa mwaka huu ni pamoja na kuratibu uanzishwaji wa Benki ya Taifa ya Ushirika ili kuchochea maendeleo ya Ushirika nchini, kufanya uthamini wa mali zinazomilikiwa na Vyama vya Ushirika kwa lengo la kutambua thamani halisi ya soko ya mali hizo na hivyo kuviwezesha vyama kufanya uwekezaji wenye tija na  kuanzisha Mfuko wa Bima ya Akiba na Amana za SACCOS utakaotumika kama kinga ya akiba na amana za wanachama wa SACCOS ambao SACCOS zao zitashindwa kufanya kazi kwa mujibu wa sheria”, alisema Mrajis wa Vyama hivyo.


Alitaja vipaumbele vingine vikiwemo vya kuimarisha udhibiti na usimamizi wa Vyama vya Ushirika kwa kutoa mafunzo kwa maafisa Ushirika 226, kuanza matumizi ya Mfumo wa Usimamizi na Ukaguzi wa Vyama vya Ushirika, kuhamasisha, kuratibu na kusimamia ujenzi na ufufuaji wa viwanda ili kuongeza thamani ya mazao, kuratibu na kuhamasisha ujenzi wa maghala ya mazao ya kilimo, kutengeneza utaratibu wa uwezeshwaji vyama vya ushirika na kuimarisha zaidi matumizi ya Vyombo vya Habari.

Rais Samia Aweka Jiwe la Msingi Ujenzi Chuo cha Ufundi Stadi (VETA) Mbarali, Awasalimia Wananchi wa Njombe

Rais Samia Afunga Maonesho ya Nane Nane mwaka 2022

Serikali Kuwekeza Zaidi Fedha Kwenye Sekta ya Kilimo na Mifugo

Na. Rahma Taratibu na Hilda Mlay, SJMC, Mbeya

Naibu Katibu Mkuu Wizara ya Fedha na Mipango, Bi. Jenifa Omolo, amesema kuwa Serikali imeongeza bajeti ya Wizara ya Kilimo kwa Mwaka wa Fedha 2022/23 kutoka Shilingi bilioni 294 hadi Shilingi bilioni 954 ili kuwezesha sekta ya kilimo kuwa na tija kwa Taifa.

Bi. Omolo alisema hayo alipotembelea Banda la Wizara ya Fedha na Mipango pamoja na Taasisi zilizo chini yake katika Maonesho ya Nanenane yanayofanyika Kitaifa katika Uwanja wa John Mwakangale, jijini Mbeya.

Alisema kuwa lengo la kuongeza bajeti ni kuwezesha upatikanaji wa mbegu bora, kuimarisha upatikanaji wa pembejeo, utoaji wa elimu kwa wakulima kupitia kwa Maafisa Ugani, kujenga skimu za umwagiliaji pamoja na kujenga maeneo ya kuhifadhi mazao.

ev eşyası depolama