Jamhuri ya Muungano wa Tanzania
Blogu ya Idara ya Habari - MAELEZO
Waziri wa Nishati na Naibu Waziri Wakagua Mradi wa Umeme wa Julius Nyerere
Waziri wa Nishati, January Makamba (aliyenyoosha mkono), akizungumza jambo katika eneo inapojengwa mitambo ya kuzalisha umeme katika Mradi Wa Umeme wa Julius Nyerere. Kushoto kwake ni Naibu Waziri wa Nishati, Wakili Stephen Byabato.
Waziri wa Nishati, January Makamba pamoja na Naibu Waziri wa Nishati, Wakili Stephen Byabato wamekagua kazi mbalimbali zinazoendelea kutekelezwa katika mradi wa umeme wa Julius Nyerere unaotekelezwa wilayani Rufiji, Mkoa wa Pwani.
Ukaguzi huo umefanyika kabla ya ziara ya Makamu wa Rais wa Jamhuri ya Muungano wa Tanzania, Dkt. Philip Isdory Mpango katika mradi huo itakayofanyika tarehe 12 Oktoba, 2021.
Waziri wa Nishati, January Makamba ( wa nane kutoka kushoto) akiwa katika picha ya pamoja na viongozi mbalimbali wa Wizara ya Nishati na TANESCO mara baada ya kukagua ujenzi wa daraja la kudumu katika mradi wa umeme wa Julius Nyerere. wa saba kushoto ni Naibu Waziri wa Nishati, Wakili Stephen Byabato. Wa nane kulia ni Naibu Katibu Mkuu, Wizara ya Nishati, Kheri Mahimbali.
Katika ukaguzi huo, viongozi hao waliambatana na Naibu Katibu Mkuu Wizara ya Nishati, Kheri Mahimbali, Kamishna wa Umeme na Nishati Jadidifu, Felchesmi Mramba, Kamishna Msaidizi wa Maendeleo ya Nishati, Mhandisi Styden Rwebangila na watendaji wengine kutoka Shirika la Umeme Tanzania ( TANESCO) na kutoka mradi wa umeme wa Julius Nyerere (JNHPP).
Waziri wa Nishati, January Makamba (wa pili kushoto), akiangalia kazi mbalimbali zinazoendelea kufanyika katika mradi wa umeme wa Julius Nyerere. Wa kwanza kushoto ni Mhandisi Mkazi wa Mradi, John Mageni.
Maeneo waliyokagua ni pamoja Tuta Kuu la Bwawa, njia za kupeleka maji kwenye mitambo ya kuzalisha umeme, Jengo la mitambo pamoja, kituo cha kupokea na kusafirisha umeme pamoja na ujenzi wa daraja la kudumu.
