Jamhuri ya Muungano wa Tanzania
Blogu ya Idara ya Habari - MAELEZO
Wizara ya Habari Yawasilisha Taarifa ya UKIMWI Kwa Kamati ya Bunge
Na Richard Mwamakafu, WHUSM
Menejimenti ya Wizara ya Habari, Utamaduni, Sanaa na Michezo ikiongozwa na Waziri wake, Mhe. Innocent Bashungwa imewasilisha taarifa kuhusu hali ya VVU/UKIMWI, Kifua Kikuu na magonjwa yasiyo ambukiza Agosti 12, 2021 kwa Kamati ya Kudumu ya Bunge ya Masuala ya UKIMWI Jijini Dodoma.
Taarifa hiyo imeainisha hali halisi ya magonjwa hayo pamoja na mafanikio, changamoto na mikakati inayochukuliwa na Wizara katika kudhibiti maambukizi mapya ambapo Wajumbe wa Kamati hiyo wameishauri Wizara kuweka mikakati mahususi ya kuhamasisha jamii kujikinga na magonjwa hayo.
Naibu Waziri wa Habari, Utamaduni, Sanaa na Michezo, Mhe. Pauline Gekul akitambulishwa katika kikao cha uwasilishwaji wa taarifa kuhusu hali ya VVU/UKIMWI, Kifua Kikuu na magonjwa yasiyo ambukiza Agosti 12, 2021 kwa Kamati ya Kudumu ya Bunge ya Masuala ya UKIMWI Jijini Dodoma.
Miongoni mwa mikakati iliyopendekezwa kutumika kudhibiti magojwa yasiyoambukiza kuwa ni pamoja na kuanzisha vikundi vya mazoezi ya pamoja maarufu kama Jogging clubs kuanzia kwenye ngazi za vijiji hadi taifa ili kuwafanya wananchi kuimarisha afya zao.
Menejimenti ya Wizara ya Habari, Utamaduni, Sanaa na Michezo ikiongozwa na Waziri wake, Mhe. Innocent Bashungwa pamoja na Kamati ya Kudumu ya Bunge ya Masuala ya UKIMWI Jijini Dodoma wakiwa katika kikao cha uwasilishwaji wa taarifa kuhusu hali ya VVU/UKIMWI, Kifua Kikuu na magonjwa yasiyo ambukiza Agosti 12, 2021 Jijini Dodoma.
Aidha, Kamati imeishauri Wizara ya Habari, Utamaduni, Sanaa na Michezo kukaa, Wizara ya Afya, Maendeleo ya Jamii, Jinsia, Wazee na Watoto pamoja na Wizara ya Elimu, Sayansi na Teknolojia ili kuona namna bora ya kuimarisha michezo katika ngazi mbalimbali kuanzia shule ya msingi hadi sekondari kama ilivyokuwa awali kabla ya kuondolewa.
Wameitaka Wizara kuwahamasisha Wasanii kupitia kazi zao kuelimisha jamii ambapo wamewapongeza baadhi ya Wasanii wa muziki wa kizazi kipya kwa kutoa nyimbo zenye tungo nzuri za kuelimisha jamii kuhusu ugonjwa wa UKIMWI.
Baadhi ya wasanii hao na nyimbo zao kwenye mabano ni pamoja na Feruz (Starehe), Matola (Kosa la Marehemu) na Mwana FA (Alikufa kwa ngoma).
Kwa upande wake, Wizara imedhamiria kuanzisha kampeni kupitia Vyombo vya Habari kuhimiza Waandishi wa Habari kuandika na kutangaza habari mbalimbali kuhusu afya na lishe ili jamii iweze kujikinga na magonjwa yasiyoambuza kama Saratani na Kisukari.
