Jamhuri ya Muungano wa Tanzania
Blogu ya Idara ya Habari - MAELEZO
Watumishi wa Ardhi Watakaomilikisha Viwanja Mara Mbili Waonywa
Waziri wa Ardhi, Nyumba na Maendeleo ya Makazi, William Lukuvi akisikiliza mgogoro wa mmoja wa wananchi aliyetembelea Banda la Wizara ya Ardhi katika Maonesho ya 45 Sabasaba tarehe 7 Julai 2021.
Na Munir Shemweta, WANMM
Waziri wa Ardhi, Nyumba na Maendeleo ya Makazi, William Lukuvi amesema watumishi wa sekta ya ardhi watakaohusika kwa namna moja ama nyingine kumilikisha kiwanja kimoja mara mbili (Double allocation) watachukuliwa hatua kali.
Akizungumza mara baada ya kukagua shughuli za utendaji wa sekta ya ardhi kwenye banda la Wizara ya Ardhi katika maonesho ya 45 ya Biashara ya Kimataifa maarufu Sabasaba 7 Julai 7, 2021 alisema, ikibainika kuna umilikishaji wa ardhi mara mbili (Double allocation) uliosababishwa na watumishi basi wote waliohusika watachukuliwa hatua.
Alisema, awali sekta ya ardhi ilikuwa na migogoro mingi lakini tangu mwaka 2015 kero nyingi za sekta hiyo zimepungua kwa kiasi kikubwa.
"Ni kweli huko nyuma tulikuwa na kero nyingi sana katika sekta ya ardhi na nina amini tangu mwaka 2015 migogoro hakuna ama imepungua sana na nisisitize kama kuna utoaji hati mara mbili wote walioshiriki kuanzia wale wa kupima, kupanga na yule aliyemilikisha watachukuliwa hatua", alisema Lukuvi.
Waziri wa Ardhi, Nyumba na Maendeleo ya Makazi, William Lukuvi akizungumza na Rais wa Mashindano ya Urembo ya Afrika Mashariki (Miss East Africa), Rina Callist wakati Rais huyo na ujumbe wake walipotembelea Banda la Wizara ya Ardhi katika Maonesho ya 45 Sabasaba tarehe 7 Julai 2021.
Kwa mujibu wa Lukuvi, Makamishna wa Ardhi Wasaidizi kwenye ofisi za ardhi za mikoa wanatakiwa kuhakikisha hakuna mgogoro mipya kwenye maeneo yao na kusisitiza kuwa ni marufuku ofisi hizo kushiriki ama kuchangia mgogoro wa ardhi.
Hata hivyo, Waziri wa Ardhi alibainisha kuwa kwa sasa Wizara yake imeanza kubadilika ambapo uandaaji na utoaji hatimiliki za ardhi umetoka kwenye mfumo wa analogia kwenda digitali na kusisitiza kuwa hayo ni mageuzi makubwa.
Waziri wa Ardhi, Nyumba na Maendeleo ya Makazi, William Lukuvi akiangalia mfano wa nyumba zinazojengwa na Shirika la Nyumba la Taifa (NHC) alipotembelea banda la shirika hilo katika Maonesho ya 45 Sabasaba tarehe 7 Julai 2021.
Akielezea zaidi mfumo wa kidigitali , Waziri Lukuvi ambaye pia alikabidhi hati za kielektroniki za papo kwa hapo kwa baadhi ya wananchi waliotembea banda la Wizara alisema mfumo huo umeasisiwa na vijana wazalendo wa kitanzania na lengo lake ni kuzuia makosa ya kibinadamu na kuongeza kuwa, anaamini migogoro inayosababishwa na tamaa za kibinadamu za watumishi itapungua.
Waziri wa Ardhi pia alitembelea Banda la Shirika la Nyumba la Taifa (NHC) na kusifu ubunifu wa shirika hilo katika ujenzi wa nyumba za kuuza na kupangisha mkoani Dodoma katika maeneo ya Iyumbu na Chamwino.
Hata hivyo, alilitaka Shirika la Nyumba la Taifa kuhakikisha wananchi wanaolipa fedha kwa ajili ya kununua nyumba wanapatiwa nyumba hizo na kumilikishwa mara tu baada ya kulipa.
