Watu 3,500 Kunufaika na Mradi wa Maji Kalaela Wilaya ya Kalambo

Sep 20, 2022

Na Jacquiline Mrisho

Tanki kubwa la maji lenye uwezo wa kuhifadhi lita 150,000 katika mradi wa maji kijiji cha Kalaela uliotekelezwa na RUWASA Wilaya ya Kalambo ambapo leo Mwenge wa Uhuru umeweka jiwe la msingi. Wananchi zaidi ya 3,500 wananufaika.

Na. OMM Rukwa

Wakala wa Majisafi na Usafi wa Mazingia Vijijini (RUWASA) Mkoa wa Rukwa imefanikisha upatikanaji wa majisafi na salama karibu na wananchi kufuatia kukamilika kwa mradi maji wa kijiji cha Kalaela Wilaya ya Kalambo utakaohudumia wakazi 3,588.

Akizungumza kwenye hafla ya uwekaji jiwe la msingi la mradi leo (20.09.2022), Kiongozi wa Mbio za Mwenge wa Uhuru Kitaifa, Sahili Geraruma aliwapongeza RUWASA kwa kujenga mradi huo kwa ubora na kuwataka wahakikishe miundombinu iliyojengwa inakuwa imara na kuepusha maji kuvuja.

**Mkuu wa Wilaya ya Kalambo, Mhe. Tano Mwera (kushoto) akipokea mwenge wa Uhuru toka kwa Mkuu wa Wilaya ya Sumbawanga, Mhe. Sebastian Waryuba leo katika kijiji cha Kazila.**

"Kila tone la maji ni dhahabu, hivyo watalaam pamoja na Mkandarasi fanyeni jitihada ili eneo lote la mradi wananchi sasa wapate huduma ya maji katika nyumba zao" alisema Geraruma.

Akitoa taarifa ya mradi huo, Meneja wa RUWASA Wilaya ya Kalambo, Mhandisi Patrick Ndimbo alisema jumla ya Shilingi milioni 152.5 kati ya Shilingi milioni 436.5 zimetumika kujenga mradi unaotekelezwa kupitia fedha za Maendeleo kwa Ustawi wa Taifa na Mapambano dhidi ya UVIKO-19.

**Mkurugenzi Mtendaji Halmashauri ya Wilaya ya Kalambo, Shafii Mpenda akishika Mwenge wa Uhuru leo katika kijiji cha Kazila wakati wa mapokezi ya Mwenge wa Uhuru ukitokea Laela wilaya ya Sumbawanga.**

Mhandisi Ndimbo alieleza kuwa tayari mradi ulianza Februari mwaka huu na umefikia asilimia 90 na huduma ya maji imeanza kupatikana kwa wananchi wa kijiji cha Kalaela na utakamilika mwezi Octoba, 2022.

Alitaja kazi zilizokamilika kuwa ni ujenzi wa bomba kuu umbali wa mita 600, ujenzi wa tanki la kuhifadhia maji lita 150,000, ujenzi wa bomba la kusambazia maji umbali wa mita 3,400 na ujenzi wa vituo nane vya kuchotea maji.

Kiongozi wa Mbio za Mwenge wa Uhuru Kitaifa, Sahili Geraruma akizungumza na Meneja wa RUWASA Wilaya ya Kalambo, Mhandisi Patrick Ndimbo (kulia) kabla ya uwekaji jiwe la msingi la mradi wa maji wa Kijiji cha Kalaela leo. Katikati ni Mkurugenzi Mtendaji Halmashauri ya Wilaya ya Kalambo, Shafii Mpenda.

Katika hatua nyingine, Mwenge wa Uhuru umezindua mradi wa ujenzi vyumba vinne vya madarasa katika shule ya sekondari Mwazye uliogharimu Shilingi milioni Themanini ( 80,000,000).

Kwa upande wake Mkuu wa Wilaya ya Kalambo, Tano Mwera alisema Mwenge wa Uhuru utakimbizwa na kupitia miradi mitano kwa kuweka mawe ya msingi, kuzindua na kukagua ikiwa na thamani ya Shilingi bilioni Moja na Milioni Themanini na Sita (1,086,800,000.0)