Na Mwandishi Maalum, Las Vegas, Marekani.

Waziri wa Maliasili na Utalii, Dkt. Damas Ndumbaro ameyapongeza makampuni zaidi ya nane (8) ya Kitanzania yaliyopo nchini Marekani kwa kazi nzuri ya  kuitangaza Tanzania kwenye sekta ya uwindaji wa kitalii  kwa kushiriki katika mkutano wa 50 wa mwaka wa Uwindaji wa Kitalii (Annual Hunting Convention) 

Mkutano huo wa 50 wa mwaka wa Uwindaji wa Kitalii ulioandaliwa  na Safari International Club International  (SCI) umeanza  leo  na  unafanyika  katika Jiji la Las  Vegas, Nevada nchini Marekani

Akizungumza Jijini hapa, Dkt. Ndumbaro amesema maonesho hayo yanatoa fursa kwa Tanzania yakiwemo makampuni, viongozi na maofisa wa Serikali walioshiriki katika mkutano huo kujifunza na kuinadi Tanzania katika masuala ya Uwindaji wa Kitalii katika nyanja za Kimataifa. 

“Katika maonesho haya zaidi ya makampuni 200 yanayofanya Biashara ya Uwindaji wa Kitalii kutoka kila kona ya dunia yapo hapa ikiwemo kutoka Bara la Ulaya, Amerika, Afrika, lakini nchi za Canada na Marekani yenyewe'', Amesisitiza Dkt. Ndumbaro

Dkt. Ndumbaro amesema  maonesho  hayo  ni makubwa na yanatoa fursa kwa nchi  kujifunza sekta ya uwindaji wa kitalii ilipofikia sasa hasa kipindi hiki cha ugonjwa wa UVIKO 19. 

Ameongeza kuwa, akiwa kama Waziri mwenye dhamana na Utalii anajisikia fahari kuona makampuni zaidi ya 8 ya Kitanzania yapo hapo yakiiuza Tanzania kwenye sekta ya uwindaji wa kitalii. 

Amesisitiza kuwa Mazungumzo aliyoyafanya na Makampuni hayo yametufundisha mengi ikiwemo kuanza kuingalia sekta hii ya uwindaji wa kitalii  kwa namna ya tofauti na kwamba Uwindaji ni sekta ya kipekee sana ambayo inaweza ikawa na mchango mkubwa katika uchumi wa nchi kama itachukuliwa kwa uzito unaostahili

Tumekubaliana tutaendelea kujipanga kushiriki kwa siku zilizobaki kuiuza Tanzania lakini muhimu zaidi kuongea na waandaji wa maonesho haya na maonesho mengine ili katika safari ijayo Tanzania ishiriki kama nchi kwa umoja wake na kwa fursa kubwa zaidi ili kuuza utalii wa uindaji kwa Tanzania, 

Kwa upande wake mmoja wa wanaoendesha biashara ya Utalii wa Uwindaji nchini Tanzania ambaye yupo kwenye mkutano huo, Bw. Michael Mantheakis amesema wamekuwa wakihudhuria kila mwaka na kupata faida kubwa ya soko kutoka kwa wateja wanaofika kwenye mikutano hiyo.

"Mikutano hii ni muhimu sana kuhudhuria kwani tunakutana na wageni mbalimbali na bila kuhudhuria unakosa fursa kwani Mawakala (agent) na wateja wanafika hapa, tunapokutana na wageni wetu tunapata faida ya kuweza kuendesha safari zetu, wateja na Mawakala wanapata fursa ya kutufanyia usahili na pia wanaona jinsi  tunayonadi bidhaa zetu'', alisema Michael Mantheakis.

Mkutano huo umeanza  rasmi tarehe 19 Januari, 2022 na kufunguliwa rasmi tarehe 21 Januari 2022 katika Jiji la  Las Vegas, Nevada nchini Marekani ukiwa na lengo ya kuwakutanisha watunga sera na wafanya maamuzi katika ngazi  za juu kutoka nchi  mbalimbali duniani kuweza kujadili masuala ya kisera katika kuendeleza sekta ya uwindaji.

Katika Mkutano huo, Dkt. Ndumbaro anazinadi fursa za uwekezaji za uwindaji wa kitalii zilizopo nchini Tanzania kwa lengo la kuwawezesha Matajiri wakubwa duniani kuchangamkia uwekezaji huo uliopo nchini Tanzania

Kupitia Mkutano huo Tanzania itaweza kuongeza uelewa zaidi katika masuala ya kisera na maamuzi katika kuendeleza sekta ya uwindaji wa kitalii nchini

Katika msafara huo, Waziri Dkt. Ndumbaro aliambatana na Mkurugenzi wa Idara ya Wanyamapori, Dkt. Maurus Msuha, Mwenyekiti wa Bodi ya Wakurugenzi wa TAWA, Meja Jenerali, Hamis Semfuko, Kaimu Kamishna Uhifadhi wa TAWA, Mabula Misungwi,

Mwingine  ni Mjumbe wa Bodi ya Wakurugenzi wa Mfuko wa Misitu Tanzania (TAFF)  Lulu Ng'wanakilala pamoja na Afisa Mhifadhi Mkuu wa Wanyamapori wa kutoka TAWA, Segolin Tarimo