[caption id="attachment_9656" align="aligncenter" width="750"] Kaimu Mkurugenzi Mtendaji wa TADB, Bw. Francis Assenga (aliyesimama) akifungua Warsha ya Siku Mbili ya Wadau wa Vyama vya Ushirika inayoendelea katika Ukumbi wa Mikutano wa Ofisi ya Mkuu wa Mkoa wa Mtwara. Wengine pichani ni Mkurugenzi wa Benki Kuu Tawi la Mtwara, Bw. Lucas Mwimo (kushoto) na Kaimu Katibu Tawala Msaidizi – Uchumi na Uzalishaji, Bw. Amani Rusake (kulia).[/caption]

Na Mwandishi wetu, Mtwara

Benki ya Maendeleo ya Kilimo Tanzania (TADB) imewataka wakulima wa Korosho hapa nchini kuongeza uzalishaji ili kuchangamkia fursa za masoko ya zao hilo linalohitajika zaidi katika masoko ya Marekani, Vietnam na India.

Wito huo umetolewa jana na Kaimu Mkurugenzi Mtendaji wa TADB, Bw. Francis Assenga wakati akifungua Warsha ya Siku Mbili ya Wadau wa Vyama vya Ushirika inayoendelea katika Ukumbi wa Mikutano wa Ofisi ya Mkuu wa Mkoa wa Mtwara.

Bw. Assenga alisema kuwa mahitaji ya Korosho ni makubwa sana katika soko la dunia hivyo wakulima wa zao hilo hawana budi kujizatiti ili kuhakikisha wanazalisha kiasi kikubwa cha Korosho ili kufikia au kuzidi malengo ya mavuno kwa msimu ujao ambayo yanakadiriwa kufikia kati ya tani laki tatu (3) hadi laki nne (4) ukilinganisha na takribani tani laki mbili na nusu kwa msimu uliopita.

[caption id="attachment_9658" align="aligncenter" width="750"] Mkurugenzi wa Biashara wa Mikopo wa TADB, Bw. Augustino Chacha akiwasilisha mada kuhusu mchango wa TADB katika mapinduzi ya kilimo nchini.[/caption]

Bw. Assenga alisema kuwa Korosho ni zao la kimkakati ambalo likiwekezwa kwa usahihi linaweza kunyanyua uchumi na kipato kwa wakulima wa mikoa ya Kusini na Pwani ambao ndio wazalishaji wakuu wa zao hilo.

“Nawaasa mjitahidi kulima kisasa ili kuweza kufikia au kuvuka malengo ya mavuno ya msimu huu hali itakayowaongezea kipato hivyo kufikia malengo ya serikali ya kuwanyanyua wakulima nchini,” alisema.

Kaimu Mkurugenzi huyo wa TADB aliongeza kuwa Benki yake imejipanga kusaidia mfumo wa Stakabadhi ghalani ili kuhakikisha kuwa malengo ya mavuno ya Korosho kwa msimu huu yanafikiwa.

[caption id="attachment_9659" align="aligncenter" width="750"] Mwakilishi wa Mrajis wa Vyama vya Ushirika Nchini, Bw. Nerei Kyara akizungumza na Wadau wa Vyama vya Ushirika wakati wa Warsha ya Siku Mbili ya Wadau inayoendelea katika Ukumbi wa Mikutano wa Ofisi ya Mkuu wa Mkoa wa Mtwara. Wengine pichani ni Kaimu Katibu Tawala Msaidizi – Uchumi na Uzalishaji, Bw. Amani Rusake (kushoto) na Mkuu wa Kilimo na Fedha Vijijini wa Mfuko wa Kukuza Sekta ya Fedha, Bw. Mwombeki Baregu.[/caption] [caption id="attachment_9661" align="aligncenter" width="750"] Wadau wa Vyama vya Ushirika wakiwa katika picha ya pamoja mara baada ya ufunguzi wa Warsha ya Siku Mbili ya Wadau hao inayoendelea katika Ukumbi wa Mikutano wa Ofisi ya Mkuu wa Mkoa wa Mtwara.[/caption]

“TADB iko tayari kuratibu mfumo wa malipo ya fedha zitokanazo na mauzo ya Korosho kwa njia ya TEHAMA, pia kwa kushiriakiana na soko la mazao (TMX), kusimamia ununuzi wa mazao kwa njia ya mtandao (electronic auction),” aliongeza.

Aliongeza kuwa Benki ipo tayari kusimamia uuzaji wa mazao kwa mifumo ya salama ya kimataifa ya malipo kama vile dhamana ya malipo.

Naye Mkurugenzi wa Biashara wa Mikopo wa TADB, Bw. Augustino Chacha alisema kuwa Benki ya Kilimo ipo tayari kutoa mikopo kwa ajili ya uendelezaji wa miundombinu ya umwagiliaji na maghala na uzalishaji wa mbegu bora za mazao ya Korosho na mihogo.

Aliongeza kuwa TADB pia ipo tayari kuviwezesha  viwanda vya kubangua mazao ya Korosho, na kusindika Ufuta, mihogo pamoja na uanzishaji wa mashamba mapya na ya kisasa ya Korosho na Ufuta.

“Tupo tayari kutoa mikopo kwa ajili ya kuwanyanyua wakulima kama ilivyolengwa na Serikali kupitia mikopo ya pembejeo kuongeza tija kwenye uzalishaji, miundo mbinu ya umwagiliaji na ununuzi wa zana za kilimo (kama matrekta,pamoja na  pampu),” alisema.

Bw. Chacha aliongeza kuwa kwa kutambua umuhimu wa uhifadhi wa mazao ya kilimo, Benki ya Kilimo ipo tayari kutoa mikopo kwa ajili ya kujenga maghala mapya au kuboresha yaliyopo pamoja na kununua mizani ya kisasa na ununuzi wa magari ya usafirishaji mazao.