Jamhuri ya Muungano wa Tanzania
Blogu ya Idara ya Habari - MAELEZO
Naibu Katibu Mkuu Yakubu Aridhishwa na Maendeleo ya Ujenzi Jengo la Wizara
Na Shamimu Nyaki - WUSM
Naibu Katibu Mkuu Wizara ya Utamaduni, Sanaa na Michezo, Saidi Yakubu ameridhishwa na kasi inayoendelea ya ujenzi wa jengo la kudumu la wizara hiyo.
Akizungumza alipotembelea eneo la ujenzi wa Mji wa Serikali Dodoma Julai 19, 2022, Bw. Yakubu amempongeza Mkandarasi Shirika la Nyumba la Taifa (NHC) kwa kuongeza kasi pamoja na Idadi ya wafanyakazi ambao umechagiza hatua ya kuridhisha katika ujenzi
"Leo kazi inaonekana, mmepiga hatua, nimeona idadi ya wafanyakazi imeongezeka, vifaa vya ujenzi vipo vya kutosha pamoja na malighafi nyingine", alisema Bw. Yakubu.
Aidha, amesisitiza Mkandarasi huyo kuongeza usalama maeneo ambayo yanachangamoto ili watu wasijekuumia pamoja na kuhakikisha eneo la kupanda miti pamoja na maua linaonekana haraka iwezekanavyo ili miti na maua yapandwe kama alivyoelekeza Waziri wa Mkuu wa Tanzania, Mhe. Kassim Majaliwa.
Kwa upande wake Mkandarasi wa jengo hilo, Ahmad Abdalah amesema amepokea maelekezo yote na pongezi alizotoa Naibu Katibu Mkuu, ambapo ameahidi kukamilisha ujenzi huo mwezi Oktoba 2023.
Jengo hilo lenye ghorofa sita kwa sasa limefikia asilimia 30 ya ujenzi na linatarajiwa kuwa na kumbi za mikutano ya ndani, sehemu za michezo na matanki ya maji yenye ujazo wa lita milioni nne pamoja na eneo la kupumzikia.
