Karibuni kwenye Blogu Rasmi ya Serikali ya Jamhuri ya Muungano wa Tanzania. Huu ni Uwanja wa Wananchi Kupata Taarifa Mbalimbali za Serikali na Masuala Mengine ya Kijamii, Kisiasa, na Kiuchumi. Blogu hii inaratibiwa na Ofisi ya Msemaji Mkuu wa Serikali kupitia Idara ya Habari (MAELEZO).

Shanta Mining Yatakiwa Kukamilisha Ulipaji Fidia

 

Naibu Waziri wa Madini, Stanslaus Nyongo (katikati) akizungumza na wananchi wa Kijiji cha Mang’onyi, Kata ya Mang’onyi, wilayani Ikungi waliosimamisha msafara wake (hawapo pichani).

Serikali imeiagiza Kampuni ya Uchimbaji Madini ya Shanta Mining Limited inayofanya shughuli zake Mkoani Singida kuharakisha ulipaji fidia kwa wananchi waliopisha maeneo yao ili shughuli za uchimbaji zianze mara moja.

Naibu Waziri wa Madini, Stanslaus Nyongo alitoa agizo hilo Desemba 12, 2017 wakati wa ziara yake ya kutembelea migodi ya dhahabu katika wilaya za Ikungi na Manyoni ili kujionea shughuli zinazoendelea pamoja na kuzungumza na wachimbaji wa madini.

“Mchakato wa fidia ufanyike haraka na mgodi uanze shughuli zake za uchimbaji mapema,” aliagiza Naibu Waziri Nyongo.

Naibu Waziri wa Madini, Stanslaus Nyongo (kushoto) akimsikiliza Meneja wa Kampuni ya Uchimbaji Madini ya Shanta Mining Limited, Mhandisi Philbert Rweyamamu (aliyesimama) akielezea shughuli na mkakati wa kampuni yake.

Akiwa njiani kuelekea kwenye Mgodi wa Dhahabu wa Elizabeth Shango uliopo katika Kijiji cha Sambaru, msafara wake ulisimamishwa na wananchi katika Kijiji cha Mang’onyi, Kata ya Mang’onyi, wilayani Ikungi ambao walilalamika kuzuiwa kuendeleza maeneo yao na kampuni hiyo na huku wakicheleweshewa kulipwa fidia.

Walisema kuwa tayari wameachia maeneo waliyokuwa wakimiliki kwa kufanya shughuli mbalimbali zikiwemo kilimo na uchimbaji mdogo wa madini ya dhahabu ili kupisha shughuli za uchimbaji mkubwa lakini Kampuni hiyo ya Shanta bado haijakamilisha ulipaji wa fidia.

Wananchi hao vilevile walimuomba Naibu Waziri Nyongo kuiagiza kampuni hiyo kuwapatia maeneo yaliyo wazi ili wafanye shughuli za uchimbaji.

Kufuatia malalamiko hayo, Naibu Waziri Nyongo aliiagiza kampuni hiyo kuhakikisha inakamilisha taratibu za ulipaji wa fidia bila kuchelewa ili shughuli za uchimbaji zianze mapema iwezekanavyo.

Baadhi ya wananchi wa Kijiji cha Mang’onyi, Kata ya Mang’onyi, wilayani Ikungi wakimsikiliza Naibu Waziri wa Madini, Stanslaus Nyongo (hayupo pichani).

“Wananchi wanayo hoja ya msingi na inapasa wasikilizwe, ili taratibu zifanyike bila kuwepo migongano isiyokuwa ya lazima,” alisema Nyongo.

Aliiagiza kampuni hiyo kushirikiana na Kamati ya Ulinzi na Usalama ya wilaya hiyo pamoja na Uongozi wa Vijiji kujenga mahusiano bora baina yao na wananchi.

Nyongo alisema ili kupunguza migogoro baina ya kampuni na wananchi ni busara wakapatiwa maeneo ili wafanye shughuli za uchimbaji.

“Wapeni na wao maeneo wachimbe, busara itumike kuwapatia maeneo mazuri ili kujenga mahusiano mazuri,” aliagiza Naibu Waziri Nyongo.

Kwa upande wake Meneja wa Kampuni hiyo, Mhandisi Philbert Rweyamamu alisema kuchelewa kwa mchakato wa ulipaji fidia kumetokana na migongano ya kijamii.

Alisema kutokana na wananchi kutokuwa na elimu sahihi ya faida ya mradi wamekuwa wakileta vikwazo katika hatua mbalimbali za mchakato wa fidia.

 

45 thoughts on “Shanta Mining Yatakiwa Kukamilisha Ulipaji Fidia

Leave a Reply

Your email address will not be published. Required fields are marked *

ev eşyası depolama