Karibuni kwenye Blogu Rasmi ya Serikali ya Jamhuri ya Muungano wa Tanzania. Huu ni Uwanja wa Wananchi Kupata Taarifa Mbalimbali za Serikali na Masuala Mengine ya Kijamii, Kisiasa, na Kiuchumi. Blogu hii inaratibiwa na Ofisi ya Msemaji Mkuu wa Serikali kupitia Idara ya Habari (MAELEZO).

Naibu Waziri Kanyasu Awafunda Watumishi wa  TFS Pamoja na Wananchi

Naibu Waziri wa Maliasili na Utalii, Mhe. Constantine Kanyasu akizungumza na wananchi kwenye mkutano wa hadhara katika kata ya Mgusu, Halmashauri ya Wilaya ya Geita mkoani Geita akiwasisitiza wananchi umuhimu wa kufuata sheria na kuacha tabia ya kuvamia Hifadhi za Misitu.

Na Lusungu Helela – Geita

Naibu Waziri wa Maliasili na Utalii, Mhe. Constantine Kanyasu amewaonya wananchi  wanaofanya shughuli za kibinadamu ndani ya Hifadhi za Misitu nchini kuacha tabia ya kuwashambulia Watumishi wa Wakala wa Huduma za Misitu Tanzania (TFS) wanapokuwa wanatekeleza majukumu yao.

Onyo hili linakuja ikiwa zaidi ya watumishi watano wa TFS  katika mikoa ya Pwani, Tabora ,Kigoma pamoja Kilimanjaro wakiwa wamepoteza maisha yao kwa kushambuliwa na wananchi wakati wakiwa wanatekeleza majukumu yao.

Aidha, Mhe.Kanyasu amepiga marufuku kwa watumishi wa TFS kujichukulia sheria mkononi kwa kuwapiga wananchi wanapobainika kutenda makosa.

“Watumishi wa TFS hamruhusiwi   kumpiga Mwananchi mnapomkamata ndani ya Hifadhi au akiwa anasafirisha mazao ya Misitu kinyume na sheria, atakayebainika sheria itachukua mkondo wake.

Ametoa  onyo hilo wakati akizungumza na wananchi  kwenye mkutano wa hadhara uliofanyika  katika kata ya Mgusu  wilayani  Geita mkoani Geita ikiwa ni ziara yake ya kutatua migogoro ya mipaka kwenye msitu wa Hifadhi Geita iliyopo baina ya Vijiji ambapo jumla ya hekta 4,462.95 zimefutwa kwa tangazo la Serikali.

 Naibu Waziri wa Maliasili na Utalii,Mhe.Constantine Kanyasu akiwa na kamati ya ulinzi na usalama ya Wilaya ya Geita mkoani Geita akipewa maelezo na Meneja wa Misitu wa Wilaya wa Wakala wa Huduma ya Misitu Tanzania (TFS), Fedy Ndandika wakati alipotembelea eneo la Manga lililokuwa limevamiwa na wakulima ambayo ni moja ya eneo la Msitu wa Hifadhi Geita

Amesema shughuli za uhifadhi ni lazima zifanyike kwa ushirikishwaji kati ya wananchi na watumishi wa TFS.

” Uhasama unaozidi kujengeka kati yenu  hauna tifa katika uhifadhi shirikianeni” amesisitiza Mhe.Kanyasu.

Amewataka wananchi kuheshimu na kuzifuata sheria za uhifadhi ya Misitu nchini huku akiwataka  watumishi kujiepusha na migongano kati yao na wananchi.

Katika hatua nyingine, Mhe.Kanyasu amewataka wananchi wafuate sheria kwa kulipia vibali kwa TFS pale wanapokuwa na mahitaji ya mazao ya Misitu badala ya kusubilia mpaka wakamatwe na TFS

Mkuu wa Wilaya ya Geita, Mhe.Josephat Maganga amemueleza Naibu Waziri huyo kuwa hali ya Misitu katika wilaya hiyo ni mbaya kufuatia shughuli za kibinadamu zinazoendelea kufanyika Misitu hiyo.

Hata hivyo, Mkuu huyo wa Wilaya  hiyoMhe.Maganga alisema kufuatia hali hiyo tayari  Kamati ya Ulinzi na Usalama kwa kushirikiana TFS wameshaanza kufanya  doria ya kuwaondoa wafugaji na wakulima waliovamia  Hifadhi.

Katika hatua nyingine, Diwani ya Kata ya Mgusu, Pastory Lugusa amemuomba  Naibu Waziri huyo kumegewa eneo la Hifadhi  kwa vile idadi ya wakazi wa kata hiyo imeongezeka hali inayopelea kukosa maeneo kwa ajili  ya malisho na Kilimo.

Kwa upande wake Meneja wa Misitu  wa  wilaya wa TFS, Fedy Ndandika amemuhakikishia Naibu Waziri kuwa  watashirikiana na wananchi hata hivyo tayari wameanza kutoa elimu ya umuhimu wa uhifadhi kwa jamii zinazozunguka Hifadhi.

 

49 thoughts on “Naibu Waziri Kanyasu Awafunda Watumishi wa  TFS Pamoja na Wananchi

Leave a Reply

Your email address will not be published. Required fields are marked *

ev eşyası depolama