Naibu Waziri Mkuu na Waziri wa Nishati, Mhe. Dkt. Doto Biteko amezindua Mpango Mkakati wa kutangaza fursa  zilizopo Sekta ya Utalii katika Wilaya ya Pangani, mkoani Tanga  ili kuunga mkono jitihada za Rais wa Jamhuri ya Muungano wa Tanzania,  Mhe. Dkt. Samia Suluhu Hassan katika kuikuza sekta hiyo nchini.

Mhe. Dkt. Biteko amefanya uzinduzi huo Oktoba 7, 2023 jijini Dar es salaam katika Kongamano la Uwekezaji la Swahili International Tourism Expo lenye lengo la kutangaza fursa za uwekezaji zilizoko katika Wilaya hiyo ikiwemo utalii katika Hifadhi ya Saadani, Fukwe za Bahari, Kilimo Biashara pamoja na Uchumi wa Buluu katika Wilaya hiyo.

Amesisitiza kuwa, Kongamano hilo litumike kuitangaza Wilaya ya Pangani na kubadilishana mawasiliano ili fursa zilizoko Pangani ambazo hazipatikani sehemu zingine zishawishi watu wengine kuzifuata.

"Niwapongeze sana watu wa Pangani kupitia Mkuu wa Wilaya  kwa ubunifu huu wa hali ya juu na nitoe wito kwa Wilaya zingine kuiga Pangani na kufungua fursa za utalii na uwekezaji kwenye Wilaya zao" ameeleza Mhe. Dkt. Biteko.

Kwa upande wake, Naibu Waziri wa Maliasili na Utalii, Mhe. Dunstan Kitandula amesema kuwa kwa sasa mchango wa Sekta ya Utalii katika Pato la Taifa ni asilimia 17 na kuongeza kuwa Serikali itaendelea kuboresha mazingira rafiki katika sekta hiyo ili kuendelea kuvutia utalii nchini katika maeneo mbalimbali hususan Wilaya ya Pangani.

Awali akizungumza kabla ya Mgeni Rasmi, Mkuu wa Wilaya ya Pangani  Mhe. Zainabu Abdallah alisema Wilaya ya  Pangani imejikita kwenye uwekezaji wa maeneo matatu ikihusisha utalii, kilimo mkakati na uchumi wa bluu na kuongeza kuwa wilaya hiyo ni miongoni mwa wilaya ya kimkakati  yenye mazingira mazuri ya uwekezaji.

"Serikali imeweka mazingira mazuri ya uwekezaji na tunawaomba wawekezaji kufika Wilaya ya Pangani kujionea fursa hizo muhimu”, alisisitiza Mhe. Zainabu.

Uzinduzi wa mpango huo ulikwenda sambamba na Kongamano la Uwekezaji chini ya maonesho ya wadau wa Sekta ya Utalii, kuunga mkono fursa za uwekezaji.