Katibu Mkuu, Ofisi  ya Waziri Mkuu, Kazi, vijana, Ajira na Wenye  Ulemavu, Prof. Jamal Katundu amesema katika mwaka wa fedha 2022/23,  miradi 149 iliyoibuliwa na vijana imepata mikopo ya Sh.ilingi bilioni 3.2 kupitia Mfuko wa Maendeleo ya Vijana.

Akifungua Kongamano la Kitaifa la Vijana katika kuelekea siku ya kimataifa ya vijana Agosti 11, 2023 jijini Dodoma, Prof. Katundu amesema miradi hiyo ni ya kwenye  sekta ya kilimo, viwanda, usafirishaji na  biashara.

Katibu Mkuu huyo amesema kwa mujibu wa takwimu za Sensa ya Watu na Makazi ya mwaka 2022, idadi ya vijana wenye umri wa kuanzia miaka 15-35 ni asilimia 34.5 hivyo wanatakiwa kujengewa uwezo wa kiuchumi.

Naye, Mratibu Mkazi wa Mashirika ya Umoja wa Mataifa Tanzania, Zlatan Milisic, amesema kuna umuhimu wa vijana kujengewa uwezo wa kiuchumi kwa kuwa inasaidia kuinua Pato la Taifa husika.