Karibuni kwenye Blogu Rasmi ya Serikali ya Jamhuri ya Muungano wa Tanzania. Huu ni Uwanja wa Wananchi Kupata Taarifa Mbalimbali za Serikali na Masuala Mengine ya Kijamii, Kisiasa, na Kiuchumi. Blogu hii inaratibiwa na Ofisi ya Msemaji Mkuu wa Serikali kupitia Idara ya Habari (MAELEZO).

Rais Magufuli Atoa Siku 3o kwa Viongozi wa Wizara ya Ujenzi, Uchukuzi na Mawasiliano

Muonekano wa ndani wa handaki ambalo jana Jumatatu (Juni 29, 2020) Rais wa Jamhuri ya Muungano wa Tanzania, Dkt. John Magufuli ameweka jiwe la msingi la ujenzi wake na mahandaki mengine madogo ambayo yatakamilisha urefu wa kilometa 2.7 katika ujenzi wa Reli ya Kisasa (SGR) kutoka Morogoro hadi Makutupora Mkoani Dodoma.

Na Mwandishi Wetu – MAELEZO

RAIS Dkt. John Magufuli ametoa siku 30 kwa Viongozi wa Wizara ya Ujenzi, Uchukuzi na Mawasiliano kumsimamia usiku na mchana mkandarasi wa kampuni ya Padiel JV kuhakikisha anakamilisha kwa haraka  kazi ya ujenzi wa barabara ya Kilosa- Dumila yenye urefu wa Kilometa 24.

Akizungumza katika hafla ya uwekaji wa jiwe la msingi la ujenzi wa barabara hiyo leo (Jumatatu Juni 29, 2020), Rais Magufuli alisema hajaridhishwa na kasi ya utekelezaji wa mradi huo inayofanywa kasi ya mkandarasi huyo kutokana ujenzi wa barabara hiyo kuchukua muda mrefu kukamilika.Alisema kumekuwepo na malalamiko ya makampuni mengi ya kizalendo yakilalamika kutopewa kazi za miradi ya serikali, lakini pindi yanapopewa kazi hiyo yameshindwa kutekeleza ujenzi wa miradi hiyo, hatua inayosababisha  kuchelewesha maendeleo ya wananchi.

Rais wa Jamhuri ya Muungano wa Tanzania, Dkt. John Magufuli akiweka jiwe la msingi la ujenzi wa mahandaki yenye urefu wa zaidi ya kilometa 2.7 katika mradi wa reli ya kisasa (SGR) kutoka Morogoro hadi Makutopora Mkoani Dodoma.

Aidha Rais Magufuli alimtaka Waziri wa Ujenzi, Uchukuzi na Mawasiliano, Mhandisi Isack Kamwelwe pamoja na Afisa Mtendaji Mkuu wa Wakala wa Barabara Nchini (TANROAD) kuhakikisha kuwa iwapo kuna vikwazo vinavyokwamiza utekelezaji wa ujenzi wa barabara hiyo ikiwemo malipo yanashughulikiwa kwa haraka.

‘’Sifurahishwi na kazi ya mkandarasi ningekuwa mimi ni Kamwelwe (Waziri) basi leo asingekuwepo huyu mkandarasi, haiwezekani tuwape kazi halafu ifanyike ya hovyo hivi, natoa rai kwa makandasi wote wanaotekeleza miradi ya ndani wabadilike’’ alisema Rais Magufuli.

 Rais wa Jamhuri ya Muungano wa Tanzania, Dkt. John Magufuli akiwa katika picha ya pamoja na Mawaziri na Watendaji mbalimbali wa Serikali na wafanyakazi wa Mradi wa reli ya kisasa (SGR) muda mfupi mara baada ya kuzindua ujenzi wa mahandaki yenye urefu wa kilometa 2.7 yatakayotumika kupitisha reli ya kisasa kutoka Morogoro hadi Makutopora Mkaoni Dodoma.

Aliongeza kuwa katika kipindi cha uongozi wake, Serikali ya Awamu ya Tano kamwe haitowatetea wakandarasi wazembe na kuitaka kampuni ya Padiel JV kuhakikisha ujenzi wa barabara hiyo inakamilika haraka kwa kuwa kwa kipindi kirefu wananchi wa Wilaya ya Kilosa wamekuwa wakiishi katika mateso makubwa ya barabara hiyo.

Aidha Rais Magufuli aliiagiza Wakala wa Barabara Nchini Mkoa wa Morogoro kuanza kufanya usanifu na upembuzi yakinifu wa kipande cha barabara iliyosalia ya Kilosa-Mikumi yenye urefu wa Kilometa 70 ili kipande hicho kiweze kukamilika kwa haraka.

Rais wa Jamhuri ya Muungano wa Tanzania, Dkt. John Magufuli akipata maelezo ya ujenzi wa handaki kubwa lenye urefu wa kilometa 1.3, akiwa ndani ya handaki hilo mara baada ya kuzindua rasmi leo Juni 29, 2020 kwenye hafla iliyofanyika Wilayani Kilosa Mkoani Morogoro.

Rais wa Jamhuri ya Muungano wa Tanzania, Dkt. John Magufuli akikata utepe kufungua ujenzi wa barabara yenye urefu wa Kilometa 24 kutoka Dumila-Kilosa-Mikumi. Hafla hiyo ilifanyika jana Jumatatu (Juni 29, 2020).

Naye Afisa Mtendaji Mkuu wa TANROAD, Mhandisi Patrick Mfugale alisema ujenzi wa barabara hiyo inayounganisha Wilaya ya Handeni (Tanga)-Turiani-Dumira-Kilosa-Mikumi, una gharama ya kiasi cha Tsh. Bilioni 32 na kukamilika kwake kunatarajia kupunguza changamoto ya wasafiri kusafiri umbali mrefu pasipo na barabara ta mchepuko.

Alisema kuwa ujenzi wa barabara hiyo ulianza februari 2019 na unatarajia kukamilika mwezi Januari 2020 ambapo ujenzi huo unatarajia kuwanufaisha makandarasi wazalendo kupata ujuzi katika ujenzi wa barabara.

Rais wa Jamhuri ya Muungano wa Tanzania, Dkt. John Magufuli akizungumza na wananchi na Viongozi mbalimbali wa Chama na Serikali Wakati wa hafla ya uzinduzi wa ujenzi wa mahandaki yenye urefu wa kilometa 2.7 yatakayotumika kupitisha reli ya kisasa (SGR) kutoka Morogoro hadi Makutopora Mkoani Dodoma.

5 thoughts on “Rais Magufuli Atoa Siku 3o kwa Viongozi wa Wizara ya Ujenzi, Uchukuzi na Mawasiliano

Leave a Reply

Your email address will not be published. Required fields are marked *