Karibuni kwenye Blogu Rasmi ya Serikali ya Jamhuri ya Muungano wa Tanzania. Huu ni Uwanja wa Wananchi Kupata Taarifa Mbalimbali za Serikali na Masuala Mengine ya Kijamii, Kisiasa, na Kiuchumi. Blogu hii inaratibiwa na Ofisi ya Msemaji Mkuu wa Serikali kupitia Idara ya Habari (MAELEZO).

Rais Dkt. Mwinyi Amuapisha Katibu Mkuu Wizara ya Biashara,Viwanda na Masoko

Makamu wa Rais Azindua Wiki ya Huduma za Fedha Mwanza

Makamu wa Rais wa Jamhuri ya Muungano wa Tanzania, Mhe. Dkt. Philip Mpango ametoa wito kwa watoaji wa huduma za kifedha nchini kutazama upya masharti ya mikopo, ikiwemo dhamana ya mali zisizohamishika kwa kuwa ni kikwazo kwa wajasiriamali pamoja na kutafuta njia za kibunifu katika kuwafikia vijana hapa nchini ili waweze kupata mikopo itakayoinua maisha yao na uchumi wa taifa kwa ujumla.

Makamu wa Rais amesema hayo leo tarehe 24 Novemba, 2022 wakati akifungua Maadhimisho ya Pili ya Wiki ya Huduma za Fedha Kitaifa yanayofanyika katika viwanja vya Rock City Mall jijini Mwanza. Aidha, amesema Riba ya mikopo ya wastani wa asilimia 16 bado ni mzigo kwa Watanzania walio wengi, hivyo amesisitiza kila benki kupitia umoja wao (TBA) kuchambua mizizi ya changamoto hiyo na kupunguza zaidi riba kwa wakopaji.

Halikadhalika, Makamu wa Rais ametoa wito kwa watoaji wa huduma za kifedha nchini kupunguza gharama za kutuma na kupokea pesa kimataifa kwa kuwa zimekua zikisababisha wageni pamoja na diaspora kutumia njia zisizo rasmi wanapowatumia pesa jamaa zao hapa nchini. Ameongeza kwamba kwa upande wa credit cards, tozo za benki na mawakala wao zimekuwa mzigo na hivyo kukwamisha watalii kununua vitu kwa wingi na kuikosesha mapato Serikali na watoa huduma mbalimbali.

Dkt. Ndumbaro Ashiriki Mkutano wa Mawaziri wa Sheria wa Nchi Wanachama wa Jumuiya ya Madola

Waziri wa Katiba na Sheria, Mhe. Dkt. Damas Ndumbaro anashiriki Mkutano wa Mawaziri wa Sheria wa Nchi Wanachama wa Jumuiya ya Madola unaofanyika Mjini Balaclava, nchini Mauritius kuanzia tarehe 22 hadi 25 Novemba, 2022.

Mkutano huo umefunguliwa na Waziri Mkuu wa Jamhuri ya Mauritius, Mhe. Pravind Kumar Jugnauth.

Mkutano huo unajadili masuala mbalimbali katika sekta ya sheria yakiwemo masuala ya upatikanaji haki, haki za binadamu, matumizi ya akili bandia katika mifumo ya Mahakama, umuhimu wa sekta ya sheria katika kukabiliana na mabadiliko ya hali ya hewa duniani.

Dkt. Mwigulu Ateta na Mkurugenzi wa Citi Bank


Scola Malinga na Josephine Majura, DSM


Waziri wa Fedha na Mipango, Mhe. Dkt. Mwingulu Lameck Nchemba, amekutana na kufanya mazungumzo na Ujumbe kutoka CITI Bank unaosimamia Ukanda wa  Jangwa la Sahara na Mashariki ya Kati , ambapo benki hiyo imeahidi kuendelea kushirikiana na Serikali katika uendelezaji wa miradi ya maendeleo, uwekezaji na kufanya tathimini ya  uwezo wa`nanchi kukopesheka (credit rating).


Dkt. Nchemba amefanya kikao jijini Dar es Salaam kwa niaba ya Rais wa Jamhuri ya Muungano wa Tanzania, Mhe. Samia Suluhu Hassan, ambapo Mkurugenzi Mtendaji wa CITI group, Bw. David McD. Livingstone amesema Benki yake inajivunia kufanya kazi na Tanzania katika kufikia agenda yake ya kuwaletea wananchi wake maendeleo ya kiuchumi na kijamii.


Mhe. Dkt. Nchemba. alielezea kuwa wamejadiliana namna ya kuharakisha ukamilishaji wa suala la tathimini ya uwezo wa nchi kukopesheka katika masoko ya kimataifa (credit rating) ndani ya mwaka wa fedha 2022/2023 ambapo CITI Group ndio  washauri wakuu wa zoezi hilo. 


Alisema kuwa Serikali inaendelea kujadili na kuhakikisha kuwa utekelezaji wa miradi mingine ambayo wao wanahusika moja kwa moja kama vile mradi wa Uwanja wa Ndege wa Pemba na miradi mingine ya maendeleo ambayo Serikali iliwahusisha katika utafutaji wa fedha ili kukamilisha miradi iliyopo kwenye mpango wa Taifa wa Maendeleo wa Miaka Mitano.

Dkt.Tax Afanya Mazungumzo na Balozi wa Urusi na Iran

Waziri wa Mambo ya Nje na Ushirikiano wa Afrika Mashariki Mhe. Dkt. Stergomena Tax leo tarehe 23 Novemba 2022 kwa nyakati tofauti amekutana kwa mazungumzo na Balozi wa Shirikisho la Urusi nchini Mhe. Andrey Levonovich Avetisyan na Balozi wa Iran nchini Mhe. Hossein Alvandi Bahineh yaliyofanyika jijini Dodoma. 

Katika mazungumzo hayo mbali na kudumisha na kuendeleza uhusiano wa kidiplomasia, vilevile yalijikita katika kujadili masuala mbalimbali yenye maslahi mapana kwa pande zote mbili na kimataifa ikiwemo biashara na uwekezaji, utalii, amani na usalama na kuendeleza sekta ya uvuvi na kilimo nchini. 

Dkt. Tax akizungumza na Balozi wa Shirikisho la Urusi nchini Mhe. Andrey Levonovich Avetisyan ameeleza kuwa licha uhusiano wa muda mrefu wa kidiplomasia uliopo kati ya mataifa haya mawili, Urusi imeendelea kuwa mshirika muhimu wa maendeleo ya sekta mbalimbali nchini. Hivyo serikali itaendelea kudumisha na kuendeleza uhusiano mzuri uliopo na kuangalia maeno mapya ya ushirikiano kwa manufaa ya pande zote mbili.

Makamu wa Rais Afungua Kongamano la 8 la Maendeleo Endelevu

Makamu wa Rais wa Jamhuri ya Muungano wa Tanzania, Mhe. Dkt. Philip Mpango ametoa wito kwa viongozi, wataalamu na wawekezaji kujadili kwa pamoja namna bora ya kutunza, kusimamia na kuwekeza katika rasilimali adhimu za fukwe zilizopo nchini ili kuongeza mchango wake kwenye maendeleo ya kiuchumi na kijamii.

Makamu wa Rais amesema hayo leo tarehe 23 Novemba, 2022 wakati akifungua Jukwaa la Nane la Maendeleo Endelevu lenye dhima ya Usimamizi Madhubuti wa Fukwe kwa Maendeleo endelevu linalofanyika Jijini Mwanza. Amesema unahitajika ubunifu katika kutumia  zaidi ya kilomita 1400 za ukanda wa Pwani ya bahari na fukwe safi, hifadhi 3 za baharini,maeneo tengefu ya baharini 15, maziwa na mito mikubwa ambayo kwa pamoja inaongeza idadi kubwa ya fukwe ambazo  bado hazijaweza kutumika kikamilifu kwa ajili ya maendeleo ya taifa.

Aidha, Makamu wa Rais amesema Serikali ya Awamu ya Sita imeweka mkazo katika kuendeleza Uchumi wa Buluu pamoja na suala la hifadhi na usimamizi wa mazingira nchini. Ameongeza kwamba dhamira ya Serikali ni kuharakisha maendeleo endelevu ya taifa kwa kuzingatia malengo ya Dira ya Maendeleo ya Taifa 2025 inayolenga kufikia uchumi jumushi wa Taifa lenye kipato cha kati na maisha bora kwa kila Mtanzania. Vilevile, Mpango wa Tatu wa Maendeleo ya Taifa wa Miaka Mitano pamoja na mikakati mingine ya kisekta na Ilani ya Uchaguzi ya Chama cha Mapinduzi (CCM) vyote vimelenga kuiwezesha sekta binafsi kuwa kichocheo cha kukuza uchumi wa Taifa na kuleta maendeleo kwa watanzania.

Pia, ameagiza kila Mkoa, kwa kushirikiana na Ofisi ya Makamu wa Rais – Muungano na Mazingira, pamoja na wadau wengine kujipanga na kuharakisha mchakato wa kuandaa mpango mkakati utakaoainisha namna ya kufanya uwekezaji wa kuendeleza fukwe zilizopo nchini pamoja na bustani za kupumzikia. Amesema mchanganyiko mzuri wa uhifadhi ukiambatana na huduma za kitalii, utaleta hamasa katika kuongeza utalii wa ndani na nje katika maeneo mbalimbali ya nchini.

Makamu wa Rais amewasihi viongozi wa mikoa kutekeleza suala la upandaji miti kwa ufanisi ikiwemo ufuatiliaji wa miti hiyo kuhakikisha inafanikiwa kukua kama ilivyopangwa. Pia amewaagiza kuweka malengo yanayotekelezeka ikiwemo kuwatumia wakala wa misitu nchini (TFS) katika elimu sahihi ya miti itakayokuwa rafiki wa vyanzo vya maji na mazingira.

Awali akitoa taarifa za kuhusu kongamano hilo, Afisa Mtendaji Mkuu wa Taasisi ya Uongozi (Uongozi Institute), Kadari Singo amesema kongamano limelenga kujadili fursa zilizopo katika uwekezaji wa fukwe kama kichochezi cha maendeleo, changamoto zinazohusiana na utunzaji na usimamizi na uwekezaji wa fukwe pamoja na mifumo ya kisera, kisheria na kitaasisi inayohusiana na usimamaizi wa fukwe nchini.

Bw. Singo ameeleza kwamba dhima ya mwaka huu katika kongamano hilo inalenga kufungua majadiliano katika kuelekea kupata suluhisho la namna madhubuti ya kusimamia na kuwekeza katika fukwe za bahari, maziwa na mito nchini ili ziweze kutoa tija katika ukuaji wa uchumi hapa nchini. Amesema dhima imezingatia dhamira ya dhati ya Serikali inayolenga kuimarisha uchumi wa nchi pasipo kuharibu mazingira.

Rais Samia Aihimiza Jamii Kupanda Miti Kukabiliana na Tabianchi

Na mwandishi wetu , Manyara

Rais wa Jamhuri ya Muungano wa Tanzania, Mhe. Samia Suluhu Hassan ameihimiza jamii kupanda miti ya kutosha lengo likiwa ni kukabiliana na mabadiliko ya Tabianchi ambayo yameanza kuleta athari katika mazingira.

Mhe. Samia amesema hayo leo Novemba 23, 2022 katika Mkutano wa Hadhara na Wananchi wa Babati mkoani Manyara uliofanyika katika Uwanja wa Kwaraa, ambapo amesema jamii inapaswa kuacha kukata miti na badala yake wapande miti kwa wingi katika maeneo mbalimbali.

“Nawaasa kupunguza migogoro baina yenu hasa migogoro ya wakulima na wafugaji ambayo inaharibu taswira ya nchi yetu, nawasihi pia wanasiasa kuacha tabia ya kuchochea migogoro hiyo bali kuwa mstari wa mbele kusimamia mipango bora ya matumizi bora ya ardhi”, amesema Mhe. Samia.

Amewaasa Watanzania kuacha tabia ya ukakitili wa kijinsia, akitolea mfano Mkoa wa Manyara kuwa na Idadi kubwa ya matukio ya ukatili wa kijinsia ambapo amesema katika ripoti ya mwaka jana ilionesha jumla ya matukio 3641, ambapo Mkoa huo ulikuwa na matukio 792 yaliyohusisha mashambulio ya kimwili na matukio 708 yakihusisha unyanyasaji wa watoto kingono.

Rais Dkt. Mwinyi Akutana na Kuzungumza na Uongozi wa Taasisi ya Mwanamke Initiative Ikulu Zanzibar

Rais Dkt. Mwinyi Akutana na Kuzungumza na Balozi wa Somali Nchini Tanzania

ev eşyası depolama