Na Mathias Canal, Wizara ya Kilimo-Dar es salaam

Waziri wa Kilimo Mhe Prof. Adolf Mkenda leo Septemba 2, 2021 amekutana na kufanya mazungumzo na Mkurugenzi Mkazi wa Kampuni ya Wilmar Tanzania, Sachin Suman katika ofisi za Wizara ya Kilimo zilizopo katika eneo la Tazara Jijini Dar es salaam.

Waziri Mkenda amekutana na Mkurugenzi huyo ambapo Kampuni yake inamiliki viwanda vikubwa 3 mkoani Morogoro na kuwahakikishia kuwa atatekeleza maagizo yaliyotolewa na Serikali kwa viongozi wa Wizara ya Viwanda na Biashara, Uwekezaji na Mamlaka za Serikali za Mitaa kuondoa urasimu unaokwamisha ujenzi wa viwanda nchini.

Katika mkutano huo Waziri Mkenda amesema kuwa wamekubaliana kuhusu kuongeza uwekezaji katika ukoboaji wa mpunga ili kuhakikisha kwamba unapatikana mchele mzuri ambao utakuwa unauzwa zaidi kimataifa.

Na, Projestus Binamungu

Waziri wa Habari, Utamaduni, Sanaa na Michezo, Mhe. Innocent Bashungwa ametoa wito kwa vilabu vyote 16 vya mchezo wa soka nchini kuhamasisha wachezaji wake, viongozi na mashabiki kupata chanjo dhidi ya Uviko 19 ili kulinda afya zao na kulinda afya za watanzania wengine.

Waziri Bashungwa ametoa rai hiyo jana Septemba 1, Jijini Dar es Salaam wakati akizungumza na Waandishi wa Habari mara baada ya mchezo wa kirafiki kati ya viongozi wa dini (Kamati ya Amani) na wachambuzi wa habari za michezo, mchezo uliopigwa katika uwanja wa Azam Complex, Chamanzi jijini Dar es Salaam.

 “Mimi kama Waziri mwenye dhamana kwenye sekta hizi nitaendelea kushirikiana na wadau wote katika kutoa elimu na hamasa kwa watanzania wenzetu kuhusu umuhimu wa kupata chanzo dhidi ya Uviko 19”. Amesisitiza Mhe. Bashungwa

Na Redempta Ndubuja

Serikali imejipanga kujenga Vituo vya Afya 220 kwenye Tarafa ambazo hazijawahi kuwa na  vituo hivyo tangu kupata Uhuru .

 Hayo  yamesemwa  leo`Jijini  Dodoma  na Waziri wa Fedha na Mipango, Dkt. Mwigulu  Nchemba  alipokuwa anazungumza  na Waandishi wa Habari kuhusu viwango vya tozo vilivyopunguzwa kwenye miamala.

“Wakati Rais Samia anapokea kijiti kulikuwa na Tarafa 217 ambazo hazikuwa na Vituo vya Afya hivyo tumeweka malengo ya kufikia vituo 220, kwa maana hiyo ndani ya siku 45 ambazo tumekusanya fedha kutoka katika miamala ya simu tumepata fedha za kujengea vituo 220 kwenye Tarafa ambazo hazikuwa na vituo hivyo”, alisema Dkt. Mwigulu

Wakala wa Taifa wa Hifadhi ya Chakula nchini (NFRA) umefanikiwa kununua tani 4,600 za mahindi zenye thamani ya Shilingi 2,300,000,000 toka kwa wakulima kati ya lengo la tani 5,000 zilizopangwa awamu ya kwanza kufikia Agosti 31, mwaka huu.

Hayo yamebainishwa leo wakati Mtendaji Mkuu wa Wakala wa Taifa wa Hifadhi ya Chakula (NFRA), Milton Lupa alipokutana na Mkuu wa Mkoa wa Rukwa, Joseph Mkirikiti ofisini kwake Sumbawanga akiwa katika ziara ya kukagua zoezi la ununuzi wa mahindi meupe linaloendelea katika Mikoa ya Nyanda za Juu Kusini.

Lupa aliongeza kusema Serikali inaendelea kuweka mazingira wezeshi ili kuendelea kununua mahindi ya wakulima kulingana na upatikanaji wa fedha.

“Wakala unaendelea kufuatilia fedha toka Serikalini ili itekeleze jukumu la kununua mahindi ya wakulima kama ilivyopangwa kwenye bajeti ya mwaka 2021/2022 hivyo wananchi wa Rukwa wawe na subira” alisema Lupa.

Na. Edward Kondela

Waziri wa Mifugo na Uvuvi, Mhe. Mashimba Ndaki ameagiza kutafutwa mara moja kwa wataalamu wa mifugo waliotoa chanjo ya mifugo katika Kijiji cha Mlazo Kilichopo Wilaya ya Chamwino mkoani Dodoma na kusababisha baadhi ya mifugo kufa na mingine kupata madhara, kufikishwa kwa Baraza la Veterinari Tanzania kwa ajili ya uchunguzi zaidi.

Waziri Ndaki amebainisha hayo jana alipofika katika Kijiji hicho mara baada ya kupatiwa taarifa juu ya madhara yaliyojitokeza baada ya mifugo hiyo kupatiwa chanjo ya Homa ya Mapafu (CBPP) na kusababisha vifo 25 vya ng’ombe, 33 walitoa mimba na waliovimba sehemu waliyochomwa sindano 58, kwa upande wa mbuzi alikufa mmoja, waliovimba watano, waliotoa mimba 12 na upande wa kondoo waliokufa 20, waliovimba 16 na waliotoa mimba watano.

Kufuatia hali hiyo na kushuhudia baadhi ya ng’ombe waliopata madhara, Waziri Ndaki amesema zoezi la chanjo ya mifugo dhidi ya magonjwa linaloendelea nchini lina lengo zuri, lakini amesikitishwa na zoezi lililofanywa katika Kijiji hicho cha Mlazo kwa kuwa halikufanywa kwa kuzingatia kanuni za kitaalamu na kuagiza pia Kampuni ya Agristeps Limited iliyoingia mkataba na Halmashauri ya Wilaya ya Chamwino kwa ajili ya kusimamia zoezi la utoaji chanjo, kuzuiwa kuendelea kutoa chanjo katika wilaya hiyo na kufikishwa kwa Baraza la Veterinari Tanzania kwa ajili ya uchunguzi zaidi.

“Wale wataalamu waliochanja ng’ombe wa hawa wafugaji watafutwe majina yao, wamesomea wapi, wapelekwe kwa Msajili wa Baraza la Veterinari Tanzania hatuwezi kuendelea kuua ng’ombe namna hii, hii kampuni ilitakiwa ijiridhishe na utaratibu na mchakato mzima wa uchomaji wa chanjo kwa kuwa amefanya kazi hii hapa kuwa mbovu asimame kuendelea kutoa chanjo kwenye Wilaya ya Chamwino tafuteni mwingine.” Mhe. Ndaki akiuarifu uongozi wa wilaya.

Aidha, Waziri wa Mifugo na Uvuvi, Mhe. Mashimba Ndaki amezitaka halmashauri zote nchini kuhakikisha watoa huduma walioingia nao mikataba ya utoaji chanjo za mifugo dhidi ya magonjwa 13 ya kimkakati, yanafuata taratibu za utoaji wa chanjo zinaoendelea kutolewa kote nchini kwa kuwa wizara ilishatoa mwongozo wa utoaji chanjo.

Na Mwandishi Wetu Morogoro

Katibu Mkuu Wizara ya Afya, Idara Kuu ya Maendeleo ya Jamii, Dkt. John Jingu ametembelea Gereza Kuu la Wanawake la Mkono wa Mara, Kingolwira mkoani Morogoro ikiwa ni sehemu ya ufuatiliaji wa ustawi wa wanawake, watoto na wazee wanaotumikia adhabu ya kifungo katika magereza mbalimbali nchini.

DKt. Jingu amesema kuwa ziara hiyo ina lengo la kuwawezesha wataalam hao kutafuta ufumbuzi wa changamoto za jamii wakiwa na uelewa mpana kuhusu changamoto mbalimbali zinazoikabili jamii hasa makundi hayo maalum.

Aidha, amesema kuwa Sekta ya Maendeleo ya Jamii inajumuisha masuala yote yanayohusu wanawake, wazee na watoto kwa hiyo ni muhimu kutafuta suluhisho la matatizo kwa watanzania wote bila ubaguzi na hivyo kuamua kufanya ziara katika magereza mbalimbali kuwasalimia na kuwasikiliza wafungwa.